قاۋىپسىزدىك كەڭەسىنىڭ وتىرىسىنان كەيىن ۇكىمەت بىردەن تاريفتەردى تومەندەتۋ جانە جالپى, تاريف جاساۋ جۇيەسىنىڭ اشىقتىعىن قامتاماسىز ەتۋ بويىنشا شارالاردى ايقىندادى. قۇرامىنا ەنەرگەتيكا, ۇلتتىق ەكونوميكا مينيسترلىكتەرىنىڭ, باس پروكۋراتۋرانىڭ وكىلدەرى ەنگەن جۇمىس توبى قۇرىلدى. باستى ماقساتى — تۇپكى تۇتىنۋشىلار ءۇشىن تاريفتەردى تومەندەتۋ. اتاپ ايتقاندا, ەلەكتر ەنەرگياسىن ءوندىرۋدىڭ وزىندىك قۇنىن انىقتاۋ ادىستەمەسى جاسالىپ جاتىر. تابيعي مونوپوليستەردىڭ قاراجاتىنىڭ ماقساتتى پايدالانىلۋىنا مەملەكەتتىك باقىلاۋدى كۇشەيتۋ جانە مونوپولياعا قارسى قىزمەتتى كۇشەيتۋ بويىنشا زاڭناماعا تۇزەتۋلەردى ازىرلەۋ باستالدى.
ەنەرگەتيكا, ۇلتتىق ەكونوميكا مينيسترلىكتەرىنىڭ الدىنا 1 جەلتوقسانعا قاراي 2019 جىلدىڭ 1 قاڭتارىنان باستاپ تاريفتەردى تومەندەتۋگە مۇمكىندىك بەرەتىن جۇيەلى شارالاردى ازىرلەۋ بويىنشا مىندەتتەر قويىلدى. وتىرىس بارىسىندا بىرقاتار ماڭىزدى ماسەلەلەر اتالىپ ءوتىلدى. بىرىنشىدەن, تاريفتەردى قالىپتاستىرۋ ءۇردىسىنىڭ اشىقتىعىن قامتاماسىز ەتۋ, ەكىنشىدەن, ەنەرگەتيكا قىزمەتتەرى نارىعىنداعى باعانىڭ قالىپتاسۋىنا مەملەكەتتىك ورگاندار تاراپىنان باقىلاۋدى كۇشەيتۋ. تاريفتەردى تومەندەتۋ ءۇشىن بارلىق قاجەتتى شەشىمدەردى جىلدام قابىلداۋ كەرەك.
وتىرىستا ەنەرگەتيكا, ۇلتتىق ەكونوميكا مينيسترلىكتەرىنىڭ باياندامالارى تىڭدالىپ, جۇمىستارى ماقۇلداندى.
سونىمەن قاتار پرەمەر-مينيستر 2019 جىلدىڭ 1 قاڭتارىنان باستاپ ەلەكتر ەنەرگياسى مەن جىلۋعا عانا ەمەس, سۋ, گازبەن جابدىقتاۋ, كارىز, تەلەفون بايلانىسى جانە ينتەرنەت قىزمەتتەرىنە تاريفتەردىڭ تومەندەۋى كەرەكتىگىن اتاپ ءوتتى. سونىمەن قاتار پيك تاريفتەرىن قايتا قاراۋ كەرەك. بۇل جەرگىلىكتى اكىمدەردىڭ قۇزىرەتىندە. بۇل ورايدا, تاريفتەردىڭ تومەندەۋى مونوپوليستەردىڭ كورسەتەتىن قىزمەتتەرىنىڭ ساپاسىن تومەندەتپەۋى ءتيىس, ولاردىڭ وندىرىستەرى ۋاقىتىلى جاڭعىرتىلىپ وتىرۋى كەرەك. قۇرىلعان جۇمىس توبى وسى باعىتتاردا جۇمىس ىستەۋى ءتيىس.
زاڭنامالىق وزگەرىستەر تۇرعىسىنان تاريف جوباسىن ۇسىنعان كەزدە جۇرتشىلىق, ساراپشىلار بىلدىرگەن پىكىرلەردى, ونىڭ ىشىندە, ەلەكتروندى تۇردە كەلىپ تۇسەتىن پىكىرلەردى ەسكەرۋ تاپسىرىلدى. كەرى بايلانىس ورناۋى ءتيىس. اكىمدىكتەردىڭ قۇزىرىنداعى وڭىرلەردەگى تۇتىنۋ نورمالارى تاريفتەرىن بەكىتۋ دە جاريالانۋى كەرەك.
ماسەلەنى قاراۋ قورتىندىسى بويىنشا پرەمەر-مينيستر بىرقاتار ناقتى تاپسىرمالار بەردى.
ءبىرىنشى. تابيعي مونوپوليستەردىڭ تاريفتىك سمەتالار مەن ينۆەستيتسيالىق مىندەتتەمەلەردى ورىنداماۋ, قىزمەت قۇنىنان وندىرىستىك ەمەس شىعىندارىن زاڭسىز قوسۋ بويىنشا انىقتالعان بارلىق فاكتىلەرگە تالداۋ جۇرگىزۋ قاجەت. جوسىقسىز مونوپوليستەر مەن تاريفتەردى كوتەرۋ ارقىلى پايداعا كەنەلگەن كومپانيالار زاڭ الدىندا جاۋاپ بەرۋى ءتيىس. ونى تەرگەۋ بارىسى جاريالانۋى كەرەك. ەكى اپتادان سوڭ اعىمداعى جاعداي تۋرالى ماسەلە كەزەكتى ۇكىمەت وتىرىسىندا قارالاتىن بولادى. پرەمەر-مينيستر قۇقىق قورعاۋ ورگاندارىمەن جانە پروكۋراتۋرامەن جۇمىستاردى ۇيلەستىرۋدى تاپسىردى.
ۇلتتىق ەكونوميكا مينيسترلىگىنە ەكى اپتادان سوڭ بيۋدجەتتەن سۋبسيديا تۇرىندە بولىنەتىن قاراجاتتى مونوپوليستەردىڭ ماقساتتى جۇمساۋى تۋرالى بايانداۋى تاپسىرىلدى. حالىقتى تكش قىزمەتتەرىنىڭ بارلىق تۇرلەرىمەن قامتاماسىز ەتەتىن ۇيىمداردىڭ مىندەتتەمەلەرىن ورىنداۋىن باقىلاۋ ناتيجەلەرى تۋرالى ەسەپتەر تىڭدالاتىن بولادى.
ەكىنشى. ۇلتتىق ەكونوميكا مينيسترلىگىنىڭ مونوپولياعا قارسى كوميتەت پەن ونىڭ وڭىرلىك بولىمشەلەرىنىڭ جۇمىسىن رەتكە كەلتىرۋگە قاتىستى تاسىلدەرىنە قولداۋ ءبىلدىرىلدى. ب. ساعىنتاەۆ ءوز تاراپىنان تابيعي مونوپوليالار سالاسىنداعى ساياسات پەن مونوپولياعا قارسى كوميتەت جۇمىسىنا جەتەكشىلىك ەتەتىن ۇلتتىق ەكونوميكا ۆيتسە-ءمينيسترى سەرىك جۇمانعاريننىڭ جازالانعانىن حابارلادى.
ءۇشىنشى. 1 جەلتوقسانعا قاراي ۇلتتىق ەكونوميكا, ەنەرگەتيكا مينيسترلىكتەرى ەلەكتر, جىلۋ, سۋ مەن گاز بەرۋ, كارىز, تەلەفون بايلانىسى, ينتەرنەت تاريفتەرى قالاي جانە قانشالىقتى تومەندەيتىنى كورسەتىلگەن جان-جاقتى جوسپاردى ەنگىزۋى ءتيىس.
پرەزيدەنت «جۇمىستى رەتكە كەلتىرىپ, الەۋمەتتىك جاۋاپكەرشىلىكتى سەزىنىپ, اشىق بولىپ, ادامداردىڭ سەنىمىنە لايىق بولۋ» مىندەتىن قويدى. وسىعان بايلانىستى ەنەرگەتيكا, ۇلتتىق ەكونوميكا مينيسترلىكتەرىنە جەلتوقساننىڭ العاشقى ونكۇندىگىندە دوڭگەلەك ۇستەل وتكىزىپ, بۇل ءىس-شارالار جوسپارىن وڭىرلىك بولىمشەلەردىڭ, پروكۋراتۋرا وكىلدەرىنىڭ, مونوپوليستەردىڭ, دەپۋتاتتاردىڭ, ۇكىمەتتىك ەمەس ۇيىمداردىڭ, باق-تىڭ قاتىسۋىمەن تالقىلاۋ تاپسىرىلدى.
باقىتجان ساعىنتاەۆ قوعامنىڭ ۇكىمەتتىڭ تاريفتەردىڭ باعاسىنىڭ جاسالۋىنىڭ اشىقتىعىن قامتاماسىز ەتۋ جانە 2019 ج. شەكتى تاريفتەردى قالىپتاستىرۋ ماسەلەلەرى بويىنشا تاسىلدەرىن ءبىلۋى ءتيىس ەكەنىن اتاپ ءوتتى. ۇلتتىق ەكونوميكا, ەنەرگەتيكا مينيسترلىكتەرىنىڭ باسشىلارى, سونىمەن قاتار وڭىرلىك بولىمشەلەردىڭ باسشىلارى جىل سوڭىنا دەيىن حالىق پەن باق الدىندا مونوپوليستەردىڭ ينۆەستيتسيالىق مىندەتتەمەلەرىن ورىنداۋ تيىمدىلىگى, تاريفتەردىڭ تومەندەۋى جانە حالىققا مونوپوليستەر زاڭسىز يەمدەنگەن قاراجاتتارىن قايتارۋ شارالارى تۋرالى كوپشىلىك الدىندا ەسەپ بەرۋى ءتيىس.
ءتورتىنشى. ۇلتتىق ەكونوميكا مينيسترلىگىنە مۇددەلى مەملەكەتتىك ورگاندارمەن بىرلەسىپ تكش مونيتورينگى رەسپۋبليكالىق جۇيەسىن قۇرۋ تاپسىرىلدى. مونيتورينگ جۇيەسى قوعام وكىلدەرىنىڭ قاتىسۋىمەن جەرگىلىكتى جەرلەردە جۇمىس ىستەپ, تاريفتەرمەن, قىزمەت ساپاسىمەن, حالىقتىڭ سۇرانىسىمەن بايلانىستى بارلىق ماسەلەلەردى كوتەرۋى ءتيىس.
سونىمەن قاتار قر ۇەم-ىنە وسى اپتانىڭ سوڭىنا دەيىن تكش تاريفتەرى بويىنشا جەدەل جەلى اشۋ تاپسىرىلدى. قابىلدانعان شارالار تۋرالى باق-قا حابارلاپ تۇرۋى ءتيىس.
بەسىنشى. ۇلتتىق ەكونوميكا, ەنەرگەتيكا مينيسترلىكتەرىنە جانە ءوڭىر اكىمدىكتەرىنە كومىردىڭ, گازدىڭ, ءدارى-دارمەكتىڭ جانە الەۋمەتتىك ماڭىزى بار تاۋارلاردىڭ باعاسىن ەرەكشە باقىلاۋعا الۋ تاپسىرىلدى. ءبىرىنشى كەزەكتە, اكىمدەر باعانىڭ نەگىزسىز وسۋىنە جول بەرمەي, كومپانيالاردىڭ «باعانى ءوزارا كەلىسىپ الۋىنىڭ», اراداعى دەلدالداردىڭ زاڭسىزدىقتارىن انىقتاۋى كەرەك.
التىنشى.ء بىلىم جانە عىلىم, دەنساۋلىق ساقتاۋ مينيسترلىكتەرىنە وسى سالالاردا حالىقتى الاڭداتىپ وتىرعان وزەكتى ماسەلەلەردى شەشۋ بويىنشا كەڭەس وتكىزۋ تاپسىرىلدى. نەگىزگى اكتسەنت — وقۋ قۇنىن, سونداي-اق مەديتسينالىق قىزمەتتەر مەن ءدارى-دارمەكتىڭ باعاسىن تومەندەتۋ. ورىندالۋ مەرزىمى — ەكى اپتا.
جەتىنشى. اقپارات جانە كوممۋنيكاتسيالار مينيسترلىگىنە بارلىق باعىتتار بويىنشا وسى جۇمىستاردىڭ بارلىعىن اقپاراتتىق سۇيەمەلدەۋدى جولعا قويۋ تاپسىرىلدى.
